أرجوا تعبير رؤياي

السلام عليكم ورحمة الله وبركاته

شفت ابي المتوفي رحمه الله بالرؤيا كأنه موجود مو متوفي بس تعبان مره وقاعد على كرسي متحرك بس مو مشلول بس من التعب
وابهام يده اليمين جزء منه اسود محروق وعادي لابس ثوب وشماغ بس مريض وبالرؤيا كأنه عايش مع اختي المتزوجه في مدينة غير مدينتنا
وكأني انا جيت عندهم وواقفه معه بالغرفه ومستغربه حاله وزعلانه عليه واقول له تعال معي ارجع بيتنا عندي عشان اراعيه واهتم فيه
قام من الكرسي بيروح معي بس يومنه عرف اني اقصد يعيش دايم معنا عيا مايبغى وكان بيرجع على كرسيه , قال بس هاللحين الين الحج وترجعوني
وانا كني اداريه ماابغاه يهون قلت له طيب  (( الوالد عمره ماكان ساكن ببيت احد كان ساكن معنا كلنا ساكنين سوا وهو اللي يصرف علينا وقايم بنا الله يرحمه واختي المتزوجه ساكنه مع زوجها بعيد ))
واتذكر مشهد بالرؤيا اني رحت لاختي المتزوجه وانا زعلانه منها ومعصبه عليها كيف مهمله الوالد بهالشكل وحسيتها مو مباليه
بس مصره يبقى عندها وماتبغاني اخذه وهي بالحلم كنها لاهيه عنه ماتقعد معه ولاتدري عنه عادي الوضع عندها فكانت تجادلني
وفجاءه شغالتنا شهدت عليها وقالت انها فعلا هاملته وماتنتبه له بس ناسيه لفظ الخدامه بس ذا القصد وانتهت الرؤيا

اسألكم بالله اذا تفسير الرؤيا فيه شر او مصيبه على اختي لا تعبرونها ابدا مااسمح لكم نهائي

واذا فيها شي يدل على سوء حال الوالد اتمنى تقولونه يصير ننتبه

ومعليش لو في اي سؤال اجاوبه خاص

وجزاكم الله خير

وعليكم السلام ورحمة الله وبركاته
اختي هل الوالد سبق له الحج

مدري يمكن لا 
والاحتمال الاكبر انه حج الله يرحمه بس في شبابه مو وهو شايب

اعملوا له حج وتصدقوا عنه وادعوا له
الرؤيا مابها شر ان شاء الله

جزاك الله خير